FORTSETZUNG VON TEIL 1


....

OVERATH: Ovverath?
CALMUND: Tach, Wolfjang, he is der Calli … (schmatz, knurpsel)
OVERATH: Tach, Calli, … bis du am esse …?
CALMUND: Klar, isch will doch net esu ussinn wie du, du Hungerhooke (knusper).
OVERATH: … und wie is et söns?
CALMUND: Joot. Pass ens op, Wolfjang, weswejen isch disch anroof. Dä Christoff bruch ja neu Lück. Ich han da ene Supper-Tipp von mingem Mann us Rio bekomme. Da is ene Jung vom Effzeh Santos, der wär jet für üch …
OVERATH: Wat dann für eine, ne Mittelfeldmann, ne Stürmer?
CALMUND: Enä, ne Verteidijer … ne rischtige Kampfsau. So ene, dä dat Metz zwische de Zäng hät beim Spille … dä määt noh jedem jrobem Foul ne Schroom in singe Schoh …
OVERATH: Calli, ne Verteidijer us Brasilje? Ich weiß et nit, su jet kann eijentlich nix sein.
CALMUND: Minge Mann is ävver wirklisch joot. Eetztens war dä allt im erweiterten Kreis von dä Olympia-Auswahl von Brasilje, zweitens is dä dritte Kreuzbandriss schon quasi verheilt und drittens kann er allt e bisje deutsch … minge Mann us Rio hät ihm VIVA COLONIA vorjespillt. Dat is der jetz dä janze Daach am übe … Ich hab en Demoprob von dem Leedche allt jehört … jlockenklar Stimm … is ausbaufähisch …
OVERATH: Hört sich joot an, wat soll dä koste?
CALMUND: Wolfjank!!! Ich sach et dich, dat is a Schnäppche, en Ringelduuv … da darf man net lang zöjere, da muss mer zuschnappe und nit lang …
OVERATH: Wie vill, CALLI???
CALMUND: Hür ens, ihr mööt noch vill liehre. Bei so enem deit mer nit lange övverläje. Da jitt e kein Hoppsassa un Trallala, da musste dä Sack zomache un… Ohhh … WOLFJANG????
OVERATH: Calli? Biste noch draan??
CALMUND: Ja, waat ens ne Momang ..... (gedämpfter Ton) Schätzelchen, deiste mir noch zwei von denne Hämmche, isch han noch e Hüngersche, … Danke, Mäuselchen … (wieder laut) Wo wore mer stonn jeblivve?
OVERATH: Du wollts mir sagen, wat der Jung koss …
CALMUND: Minge Mann us Rio säät, dä kriste locker für SIBBE Milljone Euro. Ich sach ja, e Schnäppche …
OVERATH: Calli, du bis beklopp … SIBBE Milljone. Dat is doch vill ze düür …
CALMUND: Ihr mööt ens jet riskiere. Sprisch doch ens mim Kardinal Meisner, dä kann ja en Hypthek op dä DOM opnemme. Ihr mööt ens moderne Ideen entwickeln … hääs du ming Sendung op ErrTeeeEll damals nie jesinn??
OVERATH: Wie deit dä Mann dann heiße?

CALMUND: Hönerbach!

OVERATH: Wat!!! ??? Hönerbach? Ne Brasiljaner?
CALMUND: Jo, keen Angs, dat is nur singe Künstlername. Dem singe Vatter hät in die 80er beim Ford am Band jearbeitet un hät immer dä Matthes Hönerbach beim Effzeh jesinn … un weil dä dä Matthes esu jood fand, häte singem Jung dä Name jejevve … Mim volle Name heess dä … waat, ich mus dat lesse … Carlos dos Santos Hönerbach da Luz !!
OVERATH: Calli? Ich muss jetz Schluss maache. Ähhh … dä Krisstoff is op dä anderen Leitung. Danke für dinge Aanroof.
CALMUND: Schööne Jrooß … Isch han doch gesacht, wenn isch helfen kann, tu isch dat jern. Mach et joot Wolfjang ………. Schatz, … dat wor lecker … is noch jet do?

KLICK!

OVERATH: Oh Mann, dä hät mer jrad noch jefäählt. Erst dä jecke Ailton un danach dä Calli, mir bliev och nix erspart.
MEIER: Was wollte der Reiner denn?
OVERATH: Driss verzälle, hät och prima jeklapp …
MEIER: Dann passt er ja eigentlich gut zu uns …

PLÖTZLICH öffnet sich mit Schwung die Tür und Engels steht grinsend mit einem Kranz Kölsch und einem großen Teller mit Frankfurter Würstchen parat.

ENGELS: "HERR PRÄSSSIDENT … DIE WOOOOSCH !!!"

GLOWACZ: Du bess mer och so e kölsch Hännesche, du Speimanes … eets ens dat Kölsch!

OVERATH: Jevv herr, so ihr Junge, eets ens … 1, 2, 3 …

ALLE ZUSAMMEN: "PROOOSSST ZESAMME!!!"

… AAAAAHHHH

ENGELS: Immer widder herrlisch ...
MEIER: … und was ist jetzt mit unserem Meeting?
OVERATH: Mer sin doch allt mitten drin, leeven Mischel, … deswejen maache mer jetz ja och dat Päusje … wer vill ärbigg, mus och ens entspanne. Sooo, un jetzt verzällt der Jürjen wer dat Schokoläädche evens am Telefon wor …

Damit ist auch dieses Protokoll abgeschlossen. Wie man erkennen kann, versucht nun auch Reiner Calmund, dem FC zu helfen. Es soll nicht sein letzter Anruf im Geißbockheim gewesen sein!